'ఒరు ఆదార్‌ లవ్‌' సినిమా ప్రోమో వీడియోతో ఇంటర్నెట్‌ సెన్సేషన్‌గా మారిన మలయాళ బ్యూటీ ప్రియా వారియర్‌, యూఏఈలో ఈ వీకెండ్‌ సందడి చేయబోతోంది. ప్రియా వారియర్‌తోపాటుగా, 'ఒరు ఆదార్‌ లవ్‌' చిత్రంలో నటించిన రోషన్‌ అబ్దుల్‌ రహూఫ్‌, ఈ చిత్ర దర్శకుడు ఒమర్‌ లులు కూడా యూఏఈలో పర్యటిస్తారు. దుబాయ్‌, అబుదాబీ, అల్‌ అయిన్‌లలోని మెడియోర్‌ హాస్పిటల్స్‌ని వీరు సందర్శిస్తారు. ఈ సందర్భంగా అభిమానుల్ని కలిసేందుకు కూడా ప్రత్యేకమైన ఏర్పాట్లు చేశారు. ఇండియన్‌ సోషల్‌ అండ్‌ కల్చరల్‌ సెంటర్‌, 'ఒరు ఆదార్‌ లవ్‌' యూనిట్‌తో ముచ్చటించేందుకు అవకాశం కల్పిస్తోంది. ఏప్రిల్‌ 7న అభిమానులు వీరిని కలవొచ్చు. అభిమానులు ఇప్పటికే తమ అభిమాన తారల్ని చూసేందుకోసం తగిన ఏర్పాట్లలో నిమగ్నమై వున్నారు.