పారామెడిక్‌గా 16 ఏళ్ళలో ఎన్నో ప్రమాదాల్ని కళ్ళతో చూసి, వాటికి అలవాటైపోయిన ఓ వ్యక్తి, ఓ ప్రమాదాన్ని చూసి మాత్రం షాక్‌కి గురయ్యారు. కారణం ఆ ప్రమాదంలో 12 ఏళ్ళ సోదరుడు, ఓ కుటుంబ సభ్యుడ్ని చూడాల్సి రావడమే. పారామెడిక్‌ ఫిహ్యాన్‌ అలియాన్‌ అలజాబ్రి మెదినాలోని సౌదీ రెడ్‌ క్రిసెంట్‌లో పనిచేస్తున్నారు. యాక్సిడెంట్‌ గురించిన సమాచారం అందగానే, విధి నిర్వహణలో భాగంగా ప్రమాద స్థలానికి చేరుకున్న తనకు ఆ ఘటన చూసి చాలా చాలా బాధ కలిగించిందనీ, ఆ క్షణంలో తనకేమీ అర్థం కాలేదని చెప్పారు. అక్కడ ఆ పరిస్థితుల్లో గాయాలతో బాధపడుతున్న చాలామందిలో తన సోదరుడూ వున్నాడనీ, అందరితోపాటే తన సోదరుడికీ సహాయం అందించేందుకు ప్రయత్నించానని అన్నారాయన. ఈ ఘటనలో ఫిహ్యాన్‌ సోదరుడు ప్రాణాలు కోల్పోగా, బంధువు గాయాలతో బయటపడ్డారు. మొత్తం నలుగురు ఈ ప్రమాదంలో ప్రాణాలు కోల్పోయారు. ఈ ఘటన తర్వాత ఓ పుస్తకం రాయాలని ఫిహ్యాన్‌ నిర్ణయించుకున్నారు.