దుబాయ్:పార్కింగ్‌ స్పేస్‌ కోసం వృధాగా సమయాన్ని పోగొట్టుకోవాల్సిన అవసరం లేదు. ఇలాంటి సమస్యలకు పరిష్కారంగా యాప్‌ అందుబాటులోకి వచ్చింది. ఆర్‌టిఎ (దుబాయ్‌ ట్రాన్స్‌పోర్ట్‌ అథారిటీ) ఈ మేరకు పార్కింగ్‌ రిజర్వేషన్‌ యాప్‌ని 38వ జిటెక్స్‌ వీక్‌ సందర్భంగా ప్రారంభించింది. పార్కింగ్‌ రిజర్వేషన్‌ని 10 దిర్హామ్‌ల అడ్వాన్స్‌ ప్రీమియమ్‌తో పొందేందుకు ఈ యాప్‌ అవకాశం కల్పిస్తుంది. గంటకు 10 దిర్హామ్‌లు చెల్లించి, పార్కింగ్‌ పొందవచ్చు. క్రెడిట్‌ లేదా డెబిట్‌ కార్డులతో చెల్లింపులు చేయడానికి వీలుంది. ప్రస్తుతం ఆండ్రాయిడ్‌ యూజర్ల కోసం యాప్‌ని అందుబాటులోకి తెచ్చారు. త్వరలో ఐవోఎస్‌ పవర్డ్‌ గ్యాడ్జెట్స్‌, ఐఫోన్లలోనూ పనిచేసేలా యాప్‌ని తీసుకురానున్నట్లు అధికారులు తెలిపారు. ప్రస్తుతం పార్కింగ్‌ రిజర్వేషన్స్‌ దుబాయ్‌ మెరినా, దుబాయ్‌ మీడియా సిటీలలోనే అందుబాటులో వుండగా, ముందు ముందు మరిన్ని ప్రాంతాల్లో ఈ అవకాశం కల్పిస్తారు.