అమెరికాలో సంచలనం సృష్టించిన పే టు స్టే కుంభకోణంలో పోలీసులు అరెస్ట్ చేసిన విద్యార్థుల కోసం భారతీయ రాయబార కార్యాలయం హాట్ లైన్ ఏర్పాటు చేసింది. ఈ హాట్ లైన్ 24/7 పనిచేస్తుందని ఎంబసీ అధికారులు వెల్లడించారు. సుమారు 129మంది భారతీయ విద్యార్థుల్ని అరెస్టు చేసినట్లు అక్కడి యంత్రాంగం ప్రకటించింది. ఈ హాట్ లైన్ లో 202-322-1199, 202-340-2590 నెంబర్లపై అరెస్ట్ అయిన విద్యార్థుల స్నేహితులు, కుటుంబ సభ్యులు ఎప్పుడై ఫోన్ చేసి వివరాలు తెలుసుకోవచ్చని ప్రకటించారు.

న్యూజెర్సీ, అట్లాంటా, హ్యూస్టన్, మిషిగాన్, కాలిఫోర్ని యా, లూసియానా, నార్త్ కరోలినా, మిస్సోరి రాష్ర్టాల్లో ప్రత్యేక దాడులు నిర్వహించి విద్యార్థులను యూస్ పోలీసులు అరెస్ట్ చేశారు. వీరందరిపై పౌర వలస నిబంధనల చట్టం ప్రకారం అభియోగాలు నమోదు చేయనున్నట్లు ఇమ్మిగ్రేషన్, కస్టమ్స్ ఎన్‌ఫోర్స్‌మెంట్ అధికారులు వెల్లడించారు. వీరంతా హోం ల్యాండ్ సెక్యురిటీ ఇన్వెస్టిగేషన్ అధికారుల స్ట్రింగ్ ఆపరేషన్ లో పట్టుబడ్డారు. వీసా నిబంధనలు ఉల్లంఘించి అమెరికాలోనే ఉండేందుకు ఈ విద్యార్థులంతా డెట్రాయిట్‌లోని ఫార్మింగ్‌టన్ యూనివర్సిటీలో చేరారు. భారతీయ విద్యార్థులకు సహకారం అందించేందుకు సంబంధిత అమెరికా అధికారులతో చర్చలు జరుపుతున్నారు.