సాధారణంగా స్టార్ హీరోల సినిమా స్టంట్స్ చూస్తుంటాం. అయితే సినిమాల్లో రిస్కీ స్టంట్స్ చేసేప్పుడు వారు డూప్స్ ద్వారా షూట్ చేస్తుంటారు. కానీ రియల్‌గా ఎలాంటి డూప్ లేకుండా రిస్కీ స్టెంట్ చేసి ఆశ్చర్యపరిచారు బాలీవుడ్ ఖిలాడీ అక్షయ్ కుమార్. ఓ వేదికపై తన సూట్‌కి నిప్పంటించుకొని మంటల్లో కాలిపోతూ కనిపించారు అక్షయ్. తన తాజా వెబ్ సిరీస్ ప్రమోషన్స్‌లో భాగంగా అక్షయ్ ఈ రిస్కీ స్టంట్ చేశారు.

ఓ వైపు తన సినిమాలతో బిజీగా ఉంటూనే ప్రస్తుతం అమెజాన్ ప్రైమ్ వీడియోస్ వారితో కలిసి ఓ వెబ్ సిరీస్‌లో నటిస్తున్నారు అక్షయ్ కుమార్. 'ది ఎండ్' అనే పేరుతో ఈ వెబ్ సీరీస్ తెరకెక్కుతోంది. అయితే ఈ వెబ్ సీరీస్ టైటిల్ లాంచ్ కార్యక్రమంలో భాగంగా మంటల్లో కాలిపోతూ స్టేజ్ పైకి వచ్చారు అక్షయ్. ఈ మేరకు ఆ వీడియోను సోషల్ మీడియాలో షేర్ చేసిన ఆయన.. ఇది కేవలం ఆరంభమే అని పేర్కొనడం గమనార్హం. ప్రస్తుతం ఈ వీడియో, పిక్స్ సోషల్ మీడియాలో వైరల్ అవుతున్నాయి.