ఒమన్‌:కరోనా వ్యాప్తి నియంత్రణకు భౌతిక దూరం పాటించాలని అధికారులు ఎంతగా చెబుతున్నా..కొందరు జనాలు మాత్రం తీరు మార్చుకోవటం లేదు. ఒమన్‌ లోని నార్త్‌ అల్‌ షర్ఖియా ప్రాంతంలో కొంతమంది భౌతిక దూరం నిబంధనలు పాటించకుండా ఒకే చోట గుమికూడారు. దీంతో వారిని పోలీసులు అరెస్ట్‌ చేసి..న్యాయ విచారణకు కేసును బదిలీ చేశారు. కరోనా వ్యాప్తి నియంత్రణ చర్యల్లో భాగంగా సుప్రీం కమిటీ పలు సూచనలు చేసిన విషయం తెలిసిందే. కుటుంబ సభ్యులు మినహా ఇతరులు ఎవరూ ఒకే చోట గుమికూడొద్దని నిబంధనలు విధించింది. అయినా..కొందరు జనం ఇష్టారీతిన వ్యవహరిస్తుండటంతో పోలీసులు అలాంటి వారికి కట్టడి చేసే పనిలో ఉన్నారు. కరోనా కట్టడికి ప్రతి ఒక్కరు భౌతిక దూరాన్ని ఖచ్చితంగా పాటించాల్సిందేనని, లేకపోతే అరెస్టులు తప్పవని పోలీసులు హెచ్చరిస్తున్నారు.