రియాద్:నకిలీ సిమ్ కార్డ్ స్కాంలో సౌదీ సైబర్ క్రైం పోలీసులు ఐదుగురు యెమనీస్ ను అరెస్ట్ చేశారు. పట్టుబడిన ఐదుగురు నిందితులు అల్ మర్కద్ జిల్లాలోని సెంట్రల్ రియాద్ ప్రాంతంలో అక్రమంగా సిమ్ కార్డ్ షాపు నిర్వహిస్తున్నట్లు పోలీసులు వెల్లడించారు. ఫోర్జరీ గుర్తింపు కార్డులు, నకిలీ వేలి ముద్రణ యంత్రాలతో వీళ్లు పలు కంపెనీలకు చెందిన సిమ్ కార్డులను పొందినట్లు గుర్తించారు. నిందితుల నుంచి మొత్తం 652 సిమ్ కార్డులను, నాలుగు వేలి ముద్రణ యంత్రాలను స్వాధీనం చేసుకున్నారు. స్వాధీనం చేసుకున్న సిమ్ కార్డులు అన్ని పలువురు పౌరులు, ప్రవాసీయుల పేరు మీద యాక్టివేట్ అయి ఉన్నాయి. అరెస్టైన ఐదుగురిని తదుపరి న్యాయవిచారణకు తరలించారు.