కువైట్ సిటీ:అంతర్జాతీయ విమాన సర్వీసుల విషయంలో మరో కీలక నిర్ణయం తీసుకుంది కువైట్ ప్రభుత్వం. అన్ని దేశాల నుంచి విమానాలకు అనుమతి ఇచ్చినా కరోనా ప్రభావం ఎక్కువగా ఉన్న 32 దేశాల నుంచి మాత్రం విమానాల రాకపోకలను నిషేధించింది. అయితే..ఆ 32 దేశాల నుంచి కూడా ముందస్తు అనుమతులతో ఛార్టెర్డ్ ఫ్లైట్స్ ను నడిపేందుకు గ్రీన్ సిగ్నల్ ఇచ్చింది. కువైట్ లో పలు ప్రభుత్వ విభాగాల్లో ప్రవాస కార్మికులను సమకూర్చుకునేందుకు ఈ వెసులుబాటు కల్పించింది. అంతేకాదు..పది కేటగిరిలలో ప్రవాస ఉద్యోగులు, కార్మికులను నియమించుకునేందుకు ఆమోదం తెలిపిన కువైట్..పలు దేశాల నుంచి కార్మికులను తీసుకువచ్చేందుకు వీలుగా ఆ 32 దేశాల నుంచి కూడా ఎట్టకేలకు ప్రత్యేక విమానాల రాకపోకలకు అనుమతి ఇచ్చింది. అయితే..ప్రత్యేక విమానానికి ముందుగానే ఆమోదం తీసుకోవాల్సి ఉంటుంది. అలాగే ఆయా ప్రభుత్వ విభాగాలు తమ దగ్గర పనికి కుదిరే సదరు ప్రవాస కార్మికుల పేర్లు,  ఏ విధులు నిర్వహిస్తున్న వివరాలను ముందుగా కరోనా నియంత్రణ కమిటీకి సమర్పించి వారి నుంచి నుంచి ఆమోదం తీసుకోవాల్సి ఉంటుంది.