మస్కట్:కొన్నాళ్లుగా రోడ్లపై వదిలేసిన కార్లను తొలగించే ప్రక్రియను కొనసాగిస్తోంది మస్కట్ మున్సిపాలిటి. ప్రస్తుతం ఘాల ఇండస్ట్రీయల్ జోన్ లో చాలా కాలంగా పట్టించుకోకుండా వదిలేసిన వాహనాలను అక్కడి నుంచి తరలిస్తున్నట్లు మున్సిపాలిటి అధికారులు తెలిపారు. రోడ్ల పక్కన, ఇండస్ట్రీయల్ ప్రాంతాల్లో వాహన యజమానులు తమ కార్లను పార్క్ చేసి వాటిని పట్టించుకోకుండా నెలల తరబడి వదిలివేస్తున్న విషయం తెలిసిందే. అవి దుమ్ము కొట్టికుపోయి నగర పరిశుభ్రతకు ఆటంకం కలిగించటమే కాకుండా..చోరీ ఘటనలకు ఆస్కారంగా మారుతున్నాయి. దీంతో మస్కట్ మున్సిపాలిటీ అధికారులు రోడ్ల పక్కన, ఇండస్ట్రీయల్ జోన్లలో వదిలేసిన కార్లను వెంటనే తొలగించాలని ఇప్పటికే పలు మార్లు హెచ్చరించారు. కొందరు వాహనదారులు పట్టించుకోకపోవటంతో మున్సిపాలిటీ అధికారులు ఆ వాహనాల తొలగింపు ప్రక్రియ చేపట్టారు. ఇందులో భాగంగానే ఘాలా పారిశ్రామిక వాడలోని కార్లను స్వాధీనం చేసుకొని ఇతర ప్రాంతాలకు తరలించారు.