కువైట్: వీసా గడువు ముగిసిన వారికి మరోసారి శుభవార్త అందించింది కువైట్ ప్రభుత్వం. వీసా తేది ముగిసిన పర్యాటకులు, ప్రవాసీయులు దేశం విడిచి వెళ్లే గడువును మరో నెల రోజులు పెంచింది. ఫిబ్రవరి 1 నుంచి మార్చి 2 వరకు పెంచిన గడువు వర్తిస్తుందని అంతర్గత మంత్రిత్వ శాఖ స్పష్టం చేసింది. నిజానికి గడువు ముగిసిన వీసా స్టేటస్ మార్చుకునేందుకు లేదా దేశం విడిచి వెళ్లేందుకు జనవరి 31 వరకు క్షమాభిక్ష కాలంగా ప్రకటించింది కువైట్. అయితే..వైరస్ వేరియంట్ ముప్పుతో ముందు జాగ్రత్త చర్యలు చేపట్టిన కువైట్ రెండు వారాల పాటు అంతర్జాతీయ ప్రయాణాలపై ఆంక్షలు విధించింది. ఈ నేపథ్యంలోనే వీసా గడువు ఉల్లంఘునులకు మరో నెల రోజులు అవకాశం ఇవ్వాలని ప్రభుత్వం నిర్ణయించింది. గడువు ముగిసిన వీసాలు మార్చి 2 వరకు అనుమతించేలా నిబంధనలు సడలించింది. కోవిడ్ వ్యాప్తితో గత ఏడాది సరిగ్గా మార్చిలోనే తొలిసారి వీసా తేది ముగిసిన వారికి అదనపు గడువు ఇస్తూ నిర్ణయించింది. అంటే వీసా గడువును దాదాపు ఏడాది పాటు పెంచినట్లైంది.