న్యూ ఢిల్లీ: భారత్ లో కోవిడ్ వ్యాక్సిన్ లేదా కోవిడ్ వైద్యం కోసం ఆధార్ కచ్చితంగా ఉండాలి. ఆధార్ కార్డ్ నెంబర్ ఉంటేనే..వ్యాక్సిన్ కోసం ఆరోగ్య సేతు యాప్‌ లేదా కోవిన్ పోర్టల్‌లో నమోదు చేసుకోవచ్చు.ఆధార్ కార్డ్ లేకపోతే ఇక అంతే సంగతులు.అటు ఆస్పత్రిలో ఆధార్ లేకుంటే.. కరోనా వైద్యం అందించడం లేదు ఆస్పత్రులు. అయితే ఈ ప్రక్రియతో ప్రజలు అనేక ఇబ్బందులు పడుతున్నారు.ఈ నేపథ్యంలో భారత విశిష్ట ప్రాధికార సంస్థ (UIDAI) కీలక నిర్ణయం తీసుకుంది. ఆస్పత్రుల్లో వైద్యం, మందులు, వాక్సిన్ విషయంలో ఆధార్ కార్డ్ తప్పనిసరి కాదని ఆ సంస్థ తేల్చేసింది. ఆధార్ కార్డ్ లేదని చెప్పి వ్యాక్సిన్ లను ఇవ్వడం నిరాకరించరాదని, అలాగే ఆధార్ కార్డ్ లేకపోతే కరోనా సేవలను అందించలేమని చెప్పకూడదని యూఐడీఏఐ పేర్కొంది. ఈ మేరకు యూఐడీఏఐ ఓ ప్రకటన విడుదల చేసింది.