'వి ఆర్‌ పోలీస్‌' పేరుతో దుబాయ్‌ పోలీస్‌ కొత్త వ్యూహాన్ని పన్నారు. రోడ్లపై ట్రాఫిక్‌ నిబంధనల ఉల్లంఘనలపై కొరడా ఝుళిపిస్తున్నారు. ఈ ప్రోగ్రామ్‌ ద్వారా పబ్లిక్‌లో అవేర్‌నెస్‌ పెంచి, రోడ్లపై అడ్డదిడ్డంగా వాహనాలు నడిపేవారి ఆట కట్టించనున్నారు దుబాయ్‌ పోలీసులు. పబ్లిక్‌ చెయ్యాల్సిందల్లా, నిబంధనల్ని ఉల్లంఘించేవారిని తమ కెమెరాల్లో బంధించి ఆ వీడియోలు లేదా ఫొటోల్ని దుబాయ్‌ పోలీసులకు అందించడమే. గడచిన 10 నెలల్లో 3,748 ఉల్లంఘనలకు సంబంధించి ఆధారాల్ని సామాన్యుల నుంచి సేకరించినట్లు దుబాయ్‌ పోలీసులు వెల్లడించారు. ట్రాఫిక్‌ ఇబ్బందులకు కారణమవుతున్న వారికి సంబంధించిన వీడియోలు, ఫొటోలే ఎక్కువగా వచ్చినట్లు కల్నల్‌ సైఫ్‌ ముహైర్‌ చెప్పారు. వాహనాల నెంబర్లు కన్పించేలా ఫొటోల్ని సామాన్యులు పంపవలసిందిగా ఆయన విజ్ఞప్తి చేశారు. రోడ్‌ సేఫ్టీపై అవగాహన పెంచడం, ట్రాఫిక్‌ సమస్యల పట్ల ప్రజల్లో చైతన్య పెంచడం, సామాజిక బాధ్యతను అలవాటు చేయడంలో భాగంగా 'వి ఆర్‌ పోలీస్‌'ని ప్రాంభించినట్లు కల్నల్‌ సైఫ్‌ ముహైర్‌ వివరించారు.