కువైట్ సిటీ: ఎంపీ మర్జౌక్ అల్ ఖలీఫా, ఓ ప్రతిపాదనని ప్రముఖ ప్రాంతాల్లోని ప్రైవేటు ఇళ్ళ అద్దెలకు సంబంధించి పెట్టడం జరిగింది. అనూహ్యంగా పెరుగుతున్న అద్దెలపై నియంత్రణ ఈ ప్రతిపాదన తాలూకు ఉద్దేశ్యం.క్యాపిటల్ మరియు హవాలీ గవర్నరేట్లలో చదరపు మీటరుకి 2.5 కువైటీ దినార్లకు మించకుండా అద్దె వుండాలన్నది ఎంపీ ప్రతిపాదన. అలాగే, ఫర్వానియా, జహ్రా, అహ్మది మరియు ముబారక్ అల్ కబీర్ ప్రాంతాల్లో చదరపు మీటరుకి 2 కువైటీ దినార్లకు మించకూడదని ఆయన తన ప్రతిపాదనలో పేర్కొన్నారు. మోడల్ ప్రాంతాల్లోని ప్రైవేటు ఇళ్ళకే ఈ ప్రతిపాదన రూపొందించారు. ప్రధానంగా ఈ ఇళ్ళలో కువైటీలే నివసిస్తారు. వలసదారులు ఇన్వెస్టిమెంట్ భవనాల్లో నివసిస్తుంటారు. ఆ భవనాలకు ఈ ప్రతిపాదన వర్తించదు. నేషనల్ అసెంబ్లీ ఆమోదం పొంది, ప్రభుత్వం నుంచి ఆమోదం పొందితే తప్ప ఇది చట్టంగా మారదు.