రష్యా పద్దతి సరికాదంటూ ఓటేసిన భారత న్యాయమూర్తి..మరి రష్యా ఏమంది?

- March 17, 2022 , by Maagulf
రష్యా పద్దతి సరికాదంటూ ఓటేసిన భారత న్యాయమూర్తి..మరి రష్యా ఏమంది?

ఉక్రెయిన్- రష్యా యుద్ధంపై తీర్పు వెలువరించిన అంతర్జాతీయ న్యాయస్థానం ధర్మాసనంలో భారత న్యాయమూర్తి సైతం ఉన్నారు. ఆయన రష్యాకు వ్యతిరేకంగా ఓటు వేయడం గమనార్హం. మరోవైపు.. చైనా, రష్యా న్యాయమూర్తులు ఉక్రెయిన్ పిటిషన్​ను వ్యతిరేకించారు. వివరాల్లోకి వెళితే...

ఉక్రెయిన్​పై దురాక్రమణ విషయంలో అంతర్జాతీయ న్యాయస్థానం(ఐసీజే)లో భారతీయ జడ్జి సైతం రష్యాకు వ్యతిరేకంగా ఓటేశారు. ఉక్రెయిన్​పై దండయాత్రకు వ్యతిరేకంగా ఐసీజే తీర్పు చెప్పగా.. భారత్​ నుంచి న్యాయమూర్తి జస్టిస్ దల్వీర్ భండారీ అందులో భాగమయ్యారు. సైనిక చర్యను నిలిపివేయాలని ఉక్రెయిన్ దాఖలు చేసిన పిటిషన్​పై విచారణ చేపట్టిన 15 మంది న్యాయమూర్తుల్లో.. 13మంది రష్యాకు వ్యతిరేకంగా ఓటేశారు. ఇద్దరు పిటిషన్​ను వ్యతిరేకించారు. ఉక్రెయిన్ ఫిర్యాదును తోసిపుచ్చిన వారిలో రష్యా న్యాయమూర్తి, ఐసీజే ఉపాధ్యక్షుడు కిరిల్ గెవోర్జియన్, చైనా న్యాయమూర్తి షూ హాన్​కిన్​ ఉన్నారు.

తక్షణమే రష్యా దళాలు తమ దాడులను నిలిపివేయాలని ఐసీజే బుధవారం ఆదేశాలిచ్చింది. 1948 జెనోసైడ్‌ కన్వెన్షన్‌ను రష్యా ఉల్లంఘించిందని పేర్కొంది. ఫిబ్రవరి 24న రష్యా సమాఖ్య ప్రారంభించిన సైనిక చర్యను నిలిపివేయాలంటూ తీర్పిచ్చింది. ఈ తీర్పును అమెరికా స్వాగతించింది. రష్యా వెంటనే సైనిక చర్య నిలిపివేయాలని డిమాండ్ చేసింది. ఐసేజీ తీర్పు స్పష్టంగా ఉందని అమెరికా విదేశాంగ శాఖ ప్రతినిధి నెడ్ ప్రైస్ పేర్కొన్నారు.

అయితే ఈ తీర్పునకు పుతిన్‌ ప్రభుత్వం కట్టుబడి ఉంటుందా లేదా అన్నది అనుమానమే. ఈ విచారణకు రష్యా హాజరు కాలేదు. తర్వాత లిఖిత పూర్వకంగా సమాధానమిస్తూ ఈ అంశం న్యాయస్థానం పరిధిలోకి రాదని వాదించింది. దీన్ని రష్యా అమలుచేయకపోతే.. ఐక్యరాజ్యసమితి భద్రతా మండలికి అంతర్జాతీయ న్యాయస్థానం నివేదిస్తుంది. మండలిలో రష్యాకు వీటో అధికారం ఉన్న నేపథ్యంలో తీర్పు అమలు ప్రశ్నార్థకమేనని న్యాయనిపుణులు పేర్కొంటున్నారు.

భారత్​తో అమెరికా చర్చలు..
మరోవైపు, భారత్​లోని నాయకులు రష్యా దురాక్రమణకు వ్యతిరేకంగా నిలబడేలా అమెరికా ప్రయత్నాలు చేస్తున్నట్లు శ్వేతసౌధ అధికార ప్రతినిధి జెన్ సాకి తెలిపారు. అధికారులతో ఈ మేరకు నిరంతరం సంప్రదింపులు జరుపుతున్నట్లు చెప్పారు. జాతీయ భద్రతా బృందాలు వివిధ మార్గాల్లో సంప్రదింపులు కొనసాగిస్తున్నారని వివరించారు.

Click/tap here to subscribe to MAAGULF news alerts on Telegram
   

తాజా వార్తలు

- మరిన్ని వార్తలు

Copyrights 2015 | MaaGulf.com