‘స్వయంవరం’ సినిమాలో హీరోయిన్‌గా నటించిన ముద్దుగుమ్మ లయ గుర్తుంది కదా. తొలి సినిమాతోనే కుర్రకారు గుండెల్లో గుబులు పుట్టించిన బ్యూటీ ఈ ముద్దుగుమ్మ. పదహారణాల తెలుగందం. ట్రెడిషన్‌తో పాటు, హద్దులు దాటని గ్లామర్ లుక్స్‌తోనూ కట్టిపడేసింది అప్పట్లో లయ.

‘హనుమాన్ జంక్షన్’, ‘ప్రేమించు’ తదితర సినిమాలతో సూపర్ హిట్లు అందుకుంది. హీరోయిన్‌గా కెరీర్ పీక్స్‌లో వున్నసమయంలోనే ఫారెన్ బిజినెస్ మ్యాన్‌ని పెళ్లాడి, అమెరికాలో సెటిలైపోయింది. ఇద్దరు పిల్లలకు తల్లి అయినా లయలో అందం ఇసుమంతైనా తగ్గలేదు. పిల్లలు పెద్దగా అయినా, లయ అంద చందాలకు ఏమాత్రం లోటు రాలేదు.

మొన్నా మధ్య మాస్ రాజా రవితేజ నటించిన ‘అమర్ అక్బర్ ఆంటోనీ’ సినిమాలో కూతురుతో కలిసి లయ మెరుపుతీగలా మెరిసింది. ఫ్లాష్ బ్యాక్ ఎపిసోడ్‌లో చిన్న బిట్‌లో కనిపించి మెప్పించింది లయ. ఆ తర్వాత నుంచి సినిమాల్లో కంటిన్యూ అవుతుందనుకున్నారంతా. కానీ, పెద్దగా కనిపించలేదు.

కానీ, లయకు నటనపై మోజు తగ్గలేదనీ, మంచి అవకాశాల కోసం ఎదురు చూస్తోందనీ తెలుస్తోంది. ఈ మధ్య సోషల్ మీడియాలో లయ చేస్తున్న హంగామా అంతా ఇంతా కాదు. మంచి నటనే కాదు, డాన్స్ టాలెంట్ కూడా మెండుగా వుంది లయకు. ఆ టాలెంట్‌తోనే సోషల్ మీడియాని కుదిపేస్తోంది.

కొన్నిసార్లు ఫ్రెండ్స్‌తో కలిసి, అప్పుడప్పుడూ కూతురు శ్లోకతో కలిసి లయ చేస్తున్న డాన్సింగ్ వీడియోలు నెట్టింట్లో హల్‌చల్ చేస్తున్నాయి. ఈ డాన్సింగ్ వీడియోలకు మెస్మరైజ్ అవుతున్న నెటిజన్లు లయను మళ్లీ సినిమాల్లో చూడాలని కోరుకుంటున్నారట. లయ కూడా అదే వుద్ధేశ్యంలో వున్నట్లు తెలుస్తోంది. అయితే, మన ఫిలిం మేకర్స్‌దే ఆలస్యం.