హైదరాబాద్: జర్నలిస్ట్ మరియు ఫిల్మ్ మేకర్ చిల్కూరి సుశీల్ రావు రూపొందించిన “ఇండియాస్ గ్రీన్‌హార్ట్ దుశర్ల సత్యనారాయణ” అనే డాక్యుమెంటరీకి  తెలంగాణ ఇంటర్నేషనల్ ఫిల్మ్ ఫెస్టివల్ (TIFF) స్పెషల్ జ్యూరీ అవార్డు లభించింది. హైదరాబాద్‌లోని బంజారాహిల్స్‌లోని ప్రసాద్ ల్యాబ్స్ ప్రివ్యూ థియేటర్‌లో ఇటీవల జరిగిన అవార్డుల వేడుకలో ఆయన అవార్డును అందుకున్నారు. ఈ సందర్భంగా సుశీల్ రావు మాట్లాడుతూ.. నిస్వార్థ వాతావరణ కార్యకర్త దుశర్ల సత్యనారాయణకు ఈ అవార్డు ఒక గుర్తింపన్నారు. ప్రకృతి, పర్యావరణ పరిరక్షణ ఆలోచనకు జ్యూరీ ఎంత ప్రాధాన్యత ఇస్తుందో తెలియజేస్తుందన్నారు.

ఫిల్మ్ ఫెస్టివల్‌కు మొత్తం 100 ఎంట్రీలు రాగా.. వాటిలో రెండు స్పెషల్ జ్యూరీ అవార్డులకు మూడు షార్ట్ ఎంపికయ్యాయి. బయో-డిగ్రేడబుల్ క్యారీ బ్యాగ్‌లపై DRDOలో అభివృద్ధి చేసిన టెక్నాలజీని తెలిపే డాక్యుమెంటరీకి ప్రత్యేక జ్యూరీ అవార్డును అందించారు. ఈ కార్యక్రమానికి ప్రముఖ గీత రచయిత సుద్దాల అశోక్ తేజ, టీఐఎఫ్‌ఎఫ్ వ్యవస్థాపకురాలు, చిత్ర దర్శకురాలు మంజుల సూరోజు, తెలంగాణ రాష్ట్ర పోలీస్ అకాడమీ డిప్యూటీ డైరెక్టర్ ఆర్ గిరిధర్,  ఆస్ట్రేలియాకు చెందిన టీఐఎఫ్‌ఎఫ్‌కు చెందిన మురళీ ధర్మపురి, ఇతర ప్రముఖులు  హాజరై అవార్డులను అందజేశారు.