అఫ్ఘానిస్తాన్ తాలిబన్ నాయకుడు ముల్లా అక్తర్ మన్సౌర్ లక్ష్యంగా అమెరికా దాడులు చేసింది. ఈ దాడుల్లో మన్సౌర్ హతమైవుంటాడని అమెరికా అధికారులు భావిస్తున్నారు. అప్ఘానిస్తాన్, పాకిస్తాన్ సరిహద్దులో శనివారం అమెరికా భద్రత బలగాలు డ్రోన్లతో దాడుల చేశాయి. కాగా మన్సౌర్ మరణ విషయాన్ని నిర్ధారణ చేయాల్సివుంది. మన్సౌర్ లక్ష్యంగా దాడులు చేసినట్టు పెంటగాన్ ప్రతినిధి పీటర్ కుక్ ధ్రువీకరించారు. మన్సౌర్ చనిపోయాడా లేదా అన్న విషయాన్ని కచ్చితంగా చెప్పలేదు. అయితే మన్సౌర్ హతమైనట్టు అమెరికా అధికారులు చాలామంది భావిస్తున్నారు. డ్రోన్ల దాడికి సంబంధించి మరింత సమాచారం అందాల్సివుందని కుక్ తెలిపారు.