2016 ఒలింపిక్స్‌లో తనదైన ప్రదర్శనతో భారతీయుల హృదయాలను గెలిచిన జిమ్నాస్ట్‌ దీపా కర్మాకర్‌కు అరుదైన పురస్కారం ఇవ్వాలని కేంద్రం భావిస్తోందట. ఈ నేపథ్యంలో 23 ఏళ్ల దీపాను ఖేల్‌రత్న పురస్కారానికి ఎంపిక చేయాలని నిర్ణయించినట్టు సమాచారం.
ఒలింపిక్స్‌లో పతకం చేజారినా ఆమె చేసిన విన్యాసాలు కోట్లాది మంది భారతీయులను ఆకట్టుకున్నాయి. ఈ విషయంలో ఆమెకు అవార్డ్ ఇవ్వాల్సిందేనంటూ చాలామంది క్రీడాకారులు ప్రభుత్వానికి విజ్ఞప్తి చేసినట్టు తెలుస్తోంది. జాతీయ క్రీడా దినోత్సవం సందర్భంగా రాష్ట్రపతి ప్రణబ్‌ముఖర్జీ చేతుల మీదుగా ఈ అవార్డ్‌ని ఇవ్వనున్నారు. అదే విధంగా దీప కోచ్‌ బిశ్వేశ్వర్‌కు ద్రోణాచార్య ఇవ్వాలని నిర్ణయించినట్టు వార్తలు వెలువడుతున్నాయి. మరోపక్క రియోలో 10మీటర్ల ఎయిర్‌ పిస్టల్‌ విభాగంలో ఎనిమిదో స్థానంలో నిలిచిన షూటర్‌ జితూరాయ్‌కు కూడా ఖేల్‌రత్న ఇవ్వనున్నట్లు సమాచారం.