హైదరాబాద్‌: ‘ఖైదీ నంబర్‌ 150’తో వెండితెరపై రీఎంట్రీ ఇచ్చిన చిరంజీవి తనదైన శైలిలో దూసుకుపోతున్నారు. రానా నటించిన ‘ఘాజీ’ చిత్రానికి వాయిస్‌ ఓవర్‌ అందించిన చిరు.. ఇప్పుడు మరో చిత్రంలో తన గొంతును వినిపించనున్నారు. మంచు మనోజ్‌ కథానాయకుడిగా నటిస్తున్న చిత్రం ‘గుంటూరోడు’. లవ్‌లో పడ్డాడు అనేది ఉప శీర్షిక. ఎస్‌.కె.సత్య దర్శకుడు. ప్రగ్యాజైశ్వాల్‌ కథానాయిక. ఈ చిత్రానికి చిరంజీవి వాయిస్‌ ఓవర్‌ ఇచ్చారు. ఈ సందర్భంగా కథానాయకుడు మంచుమనోజ్‌ చిరుకి కృతజ్ఞతలు తెలిపారు. ‘వరల్డ్స్‌ స్వీటెస్ట్‌ పర్సన్‌. మా చిత్ర బృందం నుంచి ధన్యవాదాలు మెగాస్టార్‌ గారు. ’ అంటూ మనోజ్‌ పేర్కొన్నారు.
చిరు మాస్‌ గెటప్‌లో ఉన్న పోస్టర్‌ను కూడా అభిమానులతో పంచుకున్నారు. మార్చి 3న ‘గుంటూరోడు’ ప్రేక్షకుల ముందుకు రానుంది.
ఇటీవలే మనోజ్‌ తన తండ్రి మోహన్‌బాబుతో కలిసి చిరంజీవిని కలిశారు. ‘మా నాన్నగారితో పాటు మెగాస్టార్‌ చిరంజీవి అంకుల్‌, సురేఖ ఆంటీతో కలిసి బ్రేక్‌ఫాస్ట్‌ చేశాను.

స్వీటెస్ట్‌ ఫ్యామిలీ’ అంటూ మనోజ్‌ సోషల్‌మీడియా వేదికగా అభిమానులతో పంచుకున్న సంగతి తెలిసిందే.