లోకల్‌ అథారిటీస్‌, డిస్ట్రెస్‌తో బాధపడుతున్న ఓ మహిళను రక్షించినట్లు అబుదాబీలోని ఇండియన్‌ ఎంబసీ వర్గాలు వెల్లడించాయి. హౌస్‌మెయిడ్‌గా పనిచేస్తోన్న ఓ మహిళ, తన యజమాని నుంచి ఇబ్బందికరమైన పరిస్థితులు ఎదుర్కొన్నారనీ, ఈ విషయమై ఎంబసీ వద్ద ఫిర్యాదు చేసేందుకు రాగా చిన్నపాటి మిస్‌ కమ్యూనికేషన్‌తో ఆమె కాంటాక్ట్‌ తప్పిపోవడం జరిగిందని, ఈ నేపథ్యంలో ఆమెను లోకల్‌ అథారిటీస్‌ రక్షించాయని ఫస్ట్‌ సెక్రెటరీ, కౌన్సిలర్‌ ఫర్‌ కమ్యూనిటీ ఎఫైర్స్‌ - ఎంబసీ దినేష్‌కుమార్‌ చెప్పారు. యజమానితో తలెత్తిన సమస్య పట్ల చర్చలతోనే పరిష్కారం వెతకాల్సిందిగా ఎంబసీ అధికారులు ఆమెకి సూచించారనీ, అలా చెప్పడానికి కారణం ఆమె కేవలం రెండు నెలల క్రితమే ఆ పనిలో చేరారని కుమార్‌ వివరించారు. ఎంబసీ అధికారులు ఆమెకు ఓ ఫోన్‌ నెంబర్‌ ఇవ్వగా, ఆమె ఫోన్‌ చేసినప్పటికీ సరైన సమాచారం ఇవ్వకపోవడంతో ఎంబసీ అధికారులు సరైన సమయంలో స్పందించలేదని కుమార్‌ చెప్పారు. బాధితురాలికి సహాయం అందించడానికి సిద్ధంగా ఉన్నామనీ, ఆమె కోరితే స్వదేశానికి పంపేందుకు తగిన ఏర్పాట్లు చేస్తామని కుమార్‌ తెలిపారు.