ప్రపంచంలోనే అత్యంత పిన్నవయస్కుడైన ఛాన్సలర్‌గా ఎదిగిన ఆస్ట్రియా యువనేత సెబాస్టియన్‌ కర్జ్‌(31)ను ప్రభుత్వాన్ని ఏర్పాటు చేయాల్సిందిగా దేశాధ్యక్షుడు శుక్రవారం ఆహ్వానించారు. 'అద్భుత యువమేధావి'గా అందరూ ఆప్యాయంగా పిలుచుకునే కర్జ్‌ సారథ్యంలోని 'పీపుల్స్‌ పార్టీ' ఇటీవలి ఎన్నికల్లో 31.5 శాతం ఓట్లను కైవశం చేసుకుని అగ్రగామిగా నిలిచిన విషయం గమనార్హం.
ప్రభుత్వాన్ని ఏర్పాటు చేయాల్సిందిగా అధ్యక్షుడు అలెగ్జాండర్‌ వాన్‌డెర్‌ బెలెన్‌ ఆహ్వానించిన నేపథ్యంలో ఇప్పుడిక సంకీర్ణం కోసం చర్చలను ప్రారంభిస్తానని యువనేత కర్జ్‌ శుక్రవారం నాడిక్కడ వెల్లడించారు. 'సరికొత్త రాజకీయ సంస్కృతి, నూతన రాజకీయ శైలి'ని తాను ఆకాంక్షిస్తున్నట్లు ఆయన ఈ సందర్భంగా చెప్పారు. ఆస్ట్రియాలో అసలు సిసలైన మార్పును తీసుకురాగల సాహసం, సంకల్పబలం ఉన్న ప్రభుత్వం ఏర్పాటు తన కల అని పేర్కొన్నారు.