యూఏఈ : భయం గొల్పే వార్తలతో నిత్యం షాకులిచ్చే పోలీసులు ...సాదుజీవులుగా మారి పిల్లల పుట్టినరోజు పండుగకు కేకులు కోయించడం ఎక్కడైనా జరుగుతుందా ? అబుదాబిలో పోలీసులు ఇటీవల మనసున్న మారాజులుగా మారిపోయారు. ఎంపిక చేసుకొన్న బాలుని పుట్టినరోజుని ముందుగా తెల్సుకొని అక్కడకు వెళ్ళి పుష్పగుచ్ఛాలతో ' హ్యాపీ బర్త్ డే ' అని శుభాకాంక్షలు దీవెనలు తెలియచేస్తున్నారు. ఈ తరహా ఆకస్మిక చర్యలతో  అబుదాబి పోలీసులు  పలువురి మనస్సులను దోచుకొంటున్నారు.  యూఏఈ లో నివాసం ఉంటున్న ఆ  ప్రవాస భారతీయ కుటుంబం తమ బాలుడికి ఈ  తరహా మర్యాద జరగడం పట్ల  ఎంతో ఆశ్చర్యానికి గురవుతున్నారు. తమ 11 ఏళ్ళ బాలుడి పుట్టినరోజు వేడుకకు అనుకోని అతిధులుగా అబుదాబి పోలీసులు యూనిఫారంతో హాజరై   పుష్పగుచ్చం అందచేసి  బర్త్ డే పార్టీలో ఆ పోలీసులు పెద్ద ఎత్తున అందరూ ఒక్కసారిగా శుభాకాంక్షలు తెలిపారు. "మంచి నమ్మకం 2017" (గుడ్విల్ 2017) వ్యూహంలో భాగంగా ఈ ప్రయత్నం స్థానికంగా అందరికి సంతోషం కల్గించింది. అంతేకాక ఆ బాలుడికి తమ పోలీస్ యూనిఫారం ధరింపచేసి తమ గస్తీ వాహనంలో ఆ బాలుని అతని తల్లిదండ్రులు ఇంటి నుండి అల్ రౌదా పోలీస్ స్టేషన్ కు తీసుకువెళ్లారు , అక్కడ పోలీసు స్టేషన్ డైరెక్టర్  హమాద్ అబ్దుల్లా అల్ అఫారి నుంచి హుందాగా ఒక కరచాలనం పుట్టినరోజు శుభాకాంక్షలు దర్జాగా ఆ బాలుడు అందుకున్నాడు. అవగాహన కేంద్ర భవనంలో  ఆ బాలుడు పోలీసుల సమక్షంలో ఒక కేక్ ను ముక్కలుగా  అందరికి పంచిపెట్టాడు. అనంతరం పోలీస్ మామయ్యలు పలు  బహుమతులు ఆ బాలునికి అందచేశారు.