పడుకునే ముందు మద్యం తాగితే నిద్ర బాగా పడుతుందని కొందరు భావిస్తుంటారు. దీంతో మొదట్లో నిద్రమత్తు ముంచుకొస్తుండొచ్చు. కానీ సమయం గడుస్తున్నకొద్దీ మత్తు ప్రభావం తగ్గిపోయి.. తరచుగా మెలకువ వస్తూనే ఉంటుంది. కోడి నిద్రే మిగులుతుంది. గాఢ నిద్ర గణనీయంగా తగ్గిపోతుంది. ఫలితంగా ఉదయం నిద్రలేచాక ఏమంత హుషారుగా ఉండదు. అలాగే మద్యం తాగి నిద్రపోయినవారికి కలలు వచ్చే అవకాశం ఎక్కువ. పీడకలలూ రావొచ్చు. కొందరు నిద్రలో లేచి నడుస్తుంటారు కూడా. మద్యం మత్తు కారణంగా శరీరంలోని అన్ని కండరాలు వదులవుతాయి. గొంతు వెనకాల కండరాలు వదులైతే శ్వాసమార్గానికి అడ్డంకి తలెత్తటం, గురక వంటివీ మొదలవుతాయి.