అమెరికాలో ఉంటున్న ప్రవాస భారతీయులకు ఇక గ్రీన్ కార్డు కష్టాలు తీరనున్నాయి. ట్రంప్ ప్రతిపాదించిన వలస విధానం అమల్లోకి వస్తే... నిపుణులైన ఉద్యోగులకు గ్రీన్ కార్డు ఆలస్యానికి తెరపడనుందని అధ్యక్ష భవనం వైట్ హౌస్ తెలిపింది. కోటావారీగా వివిధ దేశాలకు గ్రీన్ కార్డుల కేటాయింపులు రద్దు చేయాలంటూ గత వారం రోజులుగా ప్రవాస భారతీయులు  డిమాండ్ చేస్తూ వైట్ హౌస్ ముందు ఆందోళనకు దిగారు. వివిధ రాష్ట్రాలకు చెందిన ప్రవాస భారతీయులు వాషింగ్టన్ కు చేరుకొని ట్రంప్ సర్కారు, అమెరికన్ కాంగ్రెస్ సభ్యులపై తీవ్రంగా ఒత్తిడి తీసుకొచ్చారు. ఎన్నారైల నుంచి వ్యక్తమవుతున్న నిరసన నేపథ్యంలో వైట్ హౌస్ ఈ ప్రకటన జారీచేసినట్లు తెలుస్తోంది. ప్రస్తుత వలస విధానం కారణంగా హెచ్ 1బీ వీసాపై అమెరికాలో ఉద్యోగం చేస్తున్న భారతీయులకు గ్రీన్ కార్డు రావాలంటే కనీసం 70 ఏళ్లు పట్టనుంది. తాజాగా ట్రంప్ తీసుకొస్తున్న నూతన విధానం వల్ల లాటరీ విధానానికి స్వస్తి పలికి, ప్రతిభకు పట్టం కట్టనున్నారు. దీనివల్ల ప్రతిభ కలిగిన భారతీయులు గ్రీన్ కార్డుకోసం నిరీక్షించే సమయం తగ్గనుంది.