వాట్సాప్‌ సహ వ్యవస్థాపకుడు బ్రియన్‌ ఆక్టన్‌ సంచలన ట్వీట్‌ చేశారు. తమ ఫేస్‌బుక్‌ ఖాతాలను ప్రతి ఒక్కరు డిలీట్‌ చేయాలని పిలుపునిచ్చారు. పొలిటికల్‌ డేటా అనాలసిస్‌ కంపెనీ కేంబ్రిడ్జ్‌ అనలిటికా యూజర్ల అనుమతి లేకుండా ఏకంగా 5 కోట్ల మంది ఖాతాదారుల డేటాను ఉపయోగించుకున్నట్టు వార్తలు వచ్చిన నేపథ్యంలో ఆక్టన్‌ ఈ పిలుపునివ్వడం గమనార్హం. వాట్సాప్‌ను 2014లో ఫేస్‌బుక్‌ 19 బిలియన్‌ డాలర్లకు సొంతం చేసుకుంది. వాట్సాప్‌ను అమ్మేసినప్పటికీ ఆక్టన్‌ మాత్రం ఈ ఏడాది జనవరి వరకు కొనసాగారు. అయితే మరో కంపెనీని స్థాపించాలనే ఉద్దేశంతో ఈ ఏడాది మొదట్లో వాట్సాప్‌ నుంచి బయటకు వచ్చారు.