వాషింగ్టన్‌ : బ్రిటన్‌కి చెందిన రాజకీయ కన్సల్టెన్సీ సంస్థ కేంబ్రిడ్జి అనలిటికా దక్షిణ న్యూయార్క్‌ జిల్లాలో గురువారం దివాలా పిటిషన్‌ దాఖలు చేసింది. దాదాపు 8.7కోట్ల మంది ఫేస్‌బుక్‌ యూజర్ల వ్యక్తిగత సమాచారాన్ని సేకరించి ఇటీవల ఈ సంస్థ డేటా కుంభకోణంలో చిక్కుకుంది. కేంబ్రిడ్జి అనలిటికా ఎల్‌ఎల్‌సి తన ఆస్తులను లక్ష డాలర్ల నుండి ఐదు లక్షల డాలర్లవరకు పేర్కొనగా, అప్పులను మాత్రం పది లక్షల డాలర్ల నుండి కోటీ డాలర్ల వరకు పేర్కొంది. తమ కంపెనీ కార్యకలాపాలను నిలిపివేస్తున్నామని, సంస్థను మూసివేస్తామని ఈ నెల ప్రారంభంలోనే ప్రకటించింది. సంస్థను ఇలా మూసివేయడానికి కారణం తమపై మీడియా ప్రతికూల ప్రచారమేనని పేర్కొంది. ఆన్‌లైన్‌ అడ్వర్జయిజ్‌మెంట్‌లో భాగంగా న్యాయపరంగా ఆమోదించబడిన తమ కార్యకలాపాల వల్ల అవమానాల పాలయ్యామని పేర్కొంది.