భూలోకపు దినపతియగు భానుడికే  కానుకగా

ఉత్తర దిశ  పయనించే దినమే ఒక వేడుకగా

రంగవల్లి రంగులతో రంగిల్లే ముంగిళ్లతో

ముంగిళ్లను మురిపించే  ముచ్చ టైన గొబ్బిళ్లతో

రారమ్మని  రారమ్మని స్వాగతాలు పలుకుచుండ

సంక్రాంతి లక్ష్మి వచ్చింది  సంబరాల సందడితో             II రారమ్మని II

నిడి వీధిలొ హరిదాసుల మధుర మైన పాటలతో

నడి వీధిన అలుపెరుగని గంగిరెద్దు ఆటలతో

నింగి కెగసి నటన మాడు రంగుల  పతంగులతో

రంగ మెత్తి పొంగి పోరు కోడి పుంజు పందెములతో                   II రారమ్మని II

భోగి పళ్ళు పోసుకున్న పసి పాపల నవ్వులతో

పరికిణీలు  వేసుకున్న పెద పాపల రువ్వులతో

కొత్త పంట ఇంట జేర్చు రైతన్నల  సంపదతో

సంపదలో సాయ పడిన బసవన్నల బలగంతో                       II రారమ్మని II

చలి పులినే హడలించే  వడి భోగి మంటలతో

కడుపారగ భుజియించె  కనుమ రోజు వంటలతో

బంధు మిత్ర సపరివార సంతోషపు సవ్వడితో

మమతలతో ముంచెత్తే మన అందరి లోగిళ్ళకు             II రారమ్మని II