సముద్రంలో ఓ మహిళ మునిగిపోతుండడాన్ని చూసి జూనియర్‌ పోలీస్‌ అధికారి ఒకరు క్షణం ఆలోచించకుండా ఆమెను రక్షించడానికి సముద్రంలోకి దూకిన ఘటనకు పలువురి ప్రశంసలు అందుతున్నాయి. ఈ సాహస అధికారి పేరు మొహమ్మద్‌ అల్‌ అహ్మద్‌. రస్‌ అల్‌ ఖైమాలో లెఫ్టినెంట్‌గా పనిచేస్తున్నారీయన. రస్‌ అల్‌ ఖైమా పోలీస్‌ చీఫ్‌ కమాండర్‌ మేజర్‌ జనరల్‌ అలీ అల్వాన్‌ అల్‌ నువామి, లెఫ్టినెంట్‌ అల్‌ అహ్మద్‌ని సన్మానించడంతో ఈ ఘటన వెలుగు చూసింది. బీచ్‌లో స్విమ్మింగ్‌ చేస్తుండగా, ప్రమాదవశాత్తూ ఆ మహిళ సముద్రంలో మునిగిపోయింది. అది గమనించిన అల్‌ అహ్మద్‌ వెంటనే సముద్రంలోకి దూకి, ఆమెను రక్షించారు. బలమైన కెరటాల్ని లెక్కచేయకుండా అల్‌ అహ్మద్‌, ఓ మహిళను రక్షించడం ప్రశంసలు పొందుతోంది. బాధిత మహిళకు తక్షణం ప్రాధమిక చికిత్స చేసి, ఆసుపత్రికి తరలించారు. సముద్ర తీర ప్రాంతాల్లో విహారానికి వెళ్ళేవారు, స్విమ్మింగ్‌ చేసేవారు తగు జాగ్రత్తలు తీసుకోవాలని అధికారులు ఈ సందర్భంగా హెచ్చరించడం జరిగింది.