‘యానిమల్’ సినిమాతో మరోసారి తన డైరెక్షన్‌లో పదును చూపించాడు సందీప్ రెడ్డి వంగా. మొదట ఈ సినిమాని తిట్టుకున్నవాళ్లే చాలా ఎక్కువ. కానీ, ఆ తర్వాత అందరూ బాగుందనేసరికి నలుగురితో నారాయణ, గుంపులో గోవిందా.. అనాల్సొచ్చింది. అలా హిట్టు సినిమా లిస్టులోకి పోయింది.

బాక్సాఫీస్‌ వద్ద కాసుల పంట కూడా కురిపించింది ఈ సినిమా. ఓటీటీలోనూ జోరు చూపించింది. ఇక, ఆ సంగతి అటుంచితే, ఈ హుషారుతోనే ప్రబాస్‌తో సందీప్ రెడ్డి చేయబోయే సినిమాకి సంబంధించి అప్‌డేట్ వదిలాడు సందీప్ రెడ్డి వంగా.

‘స్పిరిట్’ అనే టైటిల్‌తో ప్రబాస్‌, సందీప్ రెడ్డి కాంబోలో మూవీ ఎప్పుడో అనౌన్స్ అయిన సంగతి తెలిసిందే. ఇప్పుడీ ప్రాజెక్ట్‌కి దుమ్ము దులిపి పైకి తీశాడు సందీప్ రెడ్డి వంగా.

అంతేకాదు, స్టోరీ లైన్, ప్రబాస్ క్యారెక్టర్ కూడా హింట్ ఇచ్చేశాడు. పోలీసాఫీసర్ పాత్రలో ప్రబాస్‌ని చూపించబోతున్నానని చెప్పుకొచ్చాడు. అలాగే, ఓ పవర్ ఫుల్ పోలీసాఫీసర్ కథని ఈ సినిమాలో విభిన్నంగా చూపించబోతున్నాననీ, ఇంతవరకూ పోలీసాఫీసర్ పాత్ర ఆ తరహాలో ఎవ్వరూ తెరపై చిత్రీకరించింది లేదనీ హింట్ ఇచ్చి సినిమాపై ఆసక్తి పెంచేశారు.

త్వరలోనే ఈ ప్రాజెక్ట్ పట్టాలెక్కబోతోందట. ప్రస్తుతం ‘కల్కి’, ‘రాజా సాబ్’ సినిమాలతో ప్రబాస్ బిజీగా వున్న సంగతి తెలిసిందే.